Warahan Tamong Jambat

Baginda Raja, Subhan rek Pengwal raja...!

Semok sangka hambani Allah

Warahan; Tamong Jambat

Sinji kisahni :

Wat cerita baginda raja unggal lapah “berburu” santor lapah jama indayni sai terkenal nihan ketaqwaanni jama ALLAH, Subhan gelarni indayni bagind raja jeno..... Setiap raja betungga jama sai mak betik, maj mebangik, Subhan jeno santor cawa : “Kekalau betik helau, Insya ΛLLΛH”

Kalimat seno santor diulang-ulangni, hinggok wat kejadian say mak helau, mak betik atau mak mebangik say dirasakon baginda raja...

Pernah baginda raja mid lapah “berburu” barong jama Subhan direk’i pengawalni, Induh repa selipni jarini raja kena payan, uleh tajomni payan sampai pelok jarini raja. Rahni bubor-bubor luar jak katanni jeno.

Subhan cawa, “Kekalau betik helau, insya ΛLLΛH”.

Jari telunjukni raja pelok...

Ngedengis cawani Subhan tumpak cakak rahni raja butong jama Subhan indayni jeno, ajo jari sampai pelok bang hiyung reno terus cawani Subhan. Langsung raja ngayun pengawalni ninjuk Subhan, daleh raja langsung merintahko pengawalni ngurukkon Subhan tikurung mid dilom penjara. Waktu pengawalni ditanya raja, “Api say dicawakon Subhan jeno waktu keti ngebokko rangokni penjara ?” hani baginda raja..!

Pengawal ngejawab, “Kekalau betik helau, insya ΛLLΛH.” Reno jawabni Subhan jeno baginda raja, ani pengawalni jama baginda raja niruko cawani Subhan.

Berburu....!

Pernah jak kejadian Seno raja mid lapah “berburu” luwot ia mawat direk’i Subhan lagi mani Subhan tano lagi dilom penjara ngejalani hukuman anjak raja. Lapahlah baginda raja kuruk pulan nyepok mangsa api sai aga tiburu. Api say disepok baginda raja mak puliak pak sai ya. Hinggoni baginda raja kaduni tayap/tiyayap/tejajau dilom pulan. Uleh mak dirasani ia lapah bang tejawoh-tejawoh mak ngehalu lagi ranglaya mulang. Gelarni pulan tuha seno, wat tinggal suku asli pedalaman say lagi nyembah berhala, adu kebiasan tian unggal tahun ngorbankon jelma pakai sesembahan jama berhala tian.

Baginda Raja ditinjuk suku pedalaman kaduni. Kidang, waktu raja dipersa diliak daleh dipestitiko kepala suku tian, bang jarini raja mak lengkap lagi wat sai adu pelok. Di tulak tian raja mak terima kik aga tikorbankon, mani korban harusni dilom “kondisi” sempurna makdok say kurang. Raja kaduni dilepaskon suku pedalam ia mulang mid istanani mujor lagi ngehalu ranglaya.

Akhirni raja nyadari daleh nemonko cawani Subhan indayni say tano lagi dilom penjara. Kanjak kejadian say dialami raja, baginda raja kaduni ngayun pengawalni ngelepaskon Subhan luar jak lom penjara.

“Hani baginda jama Subhan; waktu niku cawa, ‘Kekalau betik helau, Insya ΛLLΛH', waktu jariku pelok dinana. Sikindua sadar yakindo bahwa guwai helau udi yado sikindua mak jadi ditikol guwai korban persembahan jama berhalani suku pedalaman, mani fisikku mawat sempurna lagi. Raja butanya jama Subhan; Tano waktu niku dilom penjara, api say jadi betik helau diniku ?” tanya raja jama Subhan.

Subhan jeno langsung ngejawab, “Kik sikindua waktu seno barong nutuk baginda raja, radu tantu suku pedalaman haga nikol sikindua guwai pengganti baginda raja.” Reno jawabni Subhan jama baginda raja daleh ngimut rek bersyukur jama ALLAH. SWT.

Semok sangka say betiklah selalu jama ΛLLΛH SWT : "Kekalau sinji betik helau, insya ΛLLΛH.”

“Kekalau ALLAH SWT ngeni sai betik helau jama keti rumpok dilom keti rumpok ngelaphkon kehurekan. Sapa pandai keti rumpok menyuwoh jama sai keti rumpok mak demon, padahal sai dinyuwohkon keti rumpok helau nihan jama keti rumpok, rek sapa pandai api sai keti rumpok demon, padahal ia mak mehelau nihan jama keti rumpok. ΛLLΛH Maha Pandai, sedangkon keti rumpok mawat ngepandaini”. (QS Al-Baqarah: 216).

---------------------------------------------------------------------------------------------------------------------

*** Tabik..! Cerita fiksi sinji angkah pengejawantahan dilom penyampaianni anjak Surat (QS Al-Baqarah: 216).

 Rabai kintu salah terjemah dilom ayat Al-Qura’an sibenorni ya kubarangko juga terjemahni dilom bahasa Indonesia.

Berprasangka baiklah selalu kepada ΛLLΛH SWT : "Semoga ini baik, insya ΛLLΛH.”

“Semoga ALLAH SWT memberi kebaikan pada kehidupan kita. Boleh jadi kamu membenci sesuatu, padahal ia amat baik bagimu, dan boleh jadi kamu menyukai sesuatu, padahal ia amat buruk bagimu. ΛLLΛH Maha Mengetahui, sedangkan kamu tidak mengetahui”. (QS Al-Baqarah: 216).