Wayak. 10

Pekon di aris bimbin..

Tiram Pekon
Wayak; Tamong Jambat

Induh wat mawat lagi..
Pekon hiyon kenangan..
Mehayu minjak pagi..
Hawa ngison gegoran..

Tebinta minak muari..
Guwai barong seuyunan..
Kung pedak mata rani..
Mandi di Way sehayuan..

 

Mit surau lapah ngaji..
Ngusung sinjang rek sulan..
Tingok sanak kala sekeji..
Jama rek kantik memainan..

Nanggah tanoman adu kari..
Tandang kayu jeruwan..
Mit sabah nanom pari..
Risok muneh kuruk pulan..

 

Pantai...

Risok pedom buhanipi..
Sanak mandi gegeloran..
Ngawil iwa jak aris heni..
Lawok di kudan lamban..

Api kabar pekon sekeji..
Sedong tiram lain bitian..
Kabar tano mak gegoh lagi..
Adu berubah nutuk zaman..


 

Repong Damar...

Sanjor pedom niku matarani..
Dibingi tepedak muneh bulan..
Burung punai mak kudengi lagi..
Nari nyambai mak keliak’an..

Adat budaya say luhur hani..
Sanak lupa jama warisan..
Budiker radu ralang kudengi..
Mak ngeliak di penayuhan..

Api kabar pekon hiyon dudi..
Pekon ramik jak umbulan..
Miyos hawa jawoh jak polusi..
Tanoh tiyuh pekon tenggalan..

Api kabar pekon dibimbin udi..
Lagi wat kudo musim durian..
Tiram sinji ngikok dilom hati..
Dipa duku keti mak sekiriman..

Api kabar pekon nagu matarani..
Ngunduh kelapa nganik dugan..
Wayak kusampaiko jama puari..
Wat mak sekena ram semahapan..

04.04.2012