Wayak. 12

"TEBINTA DI NIKU"
Wayak; Tamong Jambat

Kapan kuliak beca..
Haga nihan nyak cakak..
.Kapan kuliak kaca..
Kimutmu say kuliak..

Ngelilit batang lada..
Junjung batangni redak..
Mak lupa waktu dinana..
Ram barong cakak darak..

Ngimut nyak ngeliak kuda..
Makai gincu rek bubedak..
Ngingok nyak kisah kita..
Setawitan barong tumbak..

Niku makai kaca mata..
Nyak makai kawai handak..
Niku kahut haga setia..
Ku tunggu kipak ngebakak..

Niku helau diliak mata..
Nyumor nyak risok mirak..
Tano niku induh dipa..?
Adu saka mawat kuliak..

Niku kahut risok kubinta..
Mak kuliak di kaca tukak..
Kabarni tano adu bahagia..
Wat kajong adu wat anak..

Tangerang, 19.05.12

Wayak. 11

Lampung

"NGUYAIKON HATI"
================
Wayak; Tamong Jambat

Bangga ram ulun lampung..
Nayah lamon cerita..
Kemuarian ram tipegung..
Berukun kanjak dinana..

Api ubahni lungkung..
Peros masin gegoh dirasa..
Berubah jaman mak urung..
Dangkung pai ram putus asa..

Suburnii tanoh lampung..
Sai ratong muneh segaga..
Hiyon nihan di kampung..
Sai nunggu tian sai tuha..

Lapah ninggalko lampung..
Sai ngura mik dipa-dipa..
Nyepok isini lungkung..
Mulang kapan kik buka..

Dang injuk kelapa kupung..
Bangkang mawat beguna..
Radu tepik lading candung..
Sugeh lapah nyepok rencaka..

Tingal do tanoh lampung..
Lapah sekula ngeliak dunia..
Sai betik rek buharung..
Ngena uleh tepedak mata..

Kambor jawoh injuk burung..
Dibi anom ia mulang juga..
Sansai tiram di lampung..
Disan jengan lebu kelama..

Tebinta kala sekeji..
Kebun sabah berak nana..
Ki pak tanohni mawat lagi..
Telanjor dang taru diranglaya..

Ganta waktuni berbakti..
Dang silau tian jak jawa..
Tanda ram wat harga diri..
Lampung tiandan jejama..

Tian rumpok laju juga..
Ram lampung unjuk diri..
Kik hiwang mak nungga bela..
Nungah kedayok ngena duri..

Musti ram lapang dada..
Nepuk way kena pudak puari..
Kik waktu mekung hak bela..
Sunyinni tinggal ram ngebabidi..

Dapok mulang kudo puari..
Sumbang pikeran sai beguna..
Kik mak neram sapa lagi..
Jama pekon dang ram lupa..

Kik Pekon tuha ilung mati..
Dang muloh jadi umbulan..
Api kidah guwaini bupati..
Mak mikerko pembangunan..

Dang tiandan sakikni hati..
Kantu pemimpin salah pilihan..
Jama ram ingok kak sai duri..
Dang salah pileh di tutukan..

Warah sinji nguyaiko hati..
Dang jadi injuk pari pukan..
Tegak mak mekuat lagi..
Rawang nganyutko lamban..

Kantu payu puwari..
Guwai radu keliwatan..
Singut ram makdok reti..
Sesol jadi hiwangan..

Kalau nihan sanak nanti..
Minjak terang pengliakan..
Bedu'a ram senang hati..
Senagni tian kena gileran...

Tangerang, 18.11.11