Nangguh Nagu Nakbai

Dewa Pujangga

_Tok..tok...took... Assalamualaykum....
-Waalaykumsalam ija kuruk...sesalaman daleh kuruk..
-Mejonga pai...
-Daleh mejong, hara injuk santai ni Lak..
-Api lg pemainan ni dija... daleh nyuwah rukuk..
-Ah..biasa api pemain mawek, injuk ayuk ni riya perulang sabah no, ana lg basa ni menah pari metong....
-Oh..ya.. ya.. ya.. adu aga juga dija ki reno lak, mni ki bagian hk unggak kamdi ampai simpun nihan jk nanom...
-Riya kudo... Daleh nyuwah rukuk...
-Lain maaf pai cawa nebak Lak..
-Ho''o....api sanduwat ni kidah...
-Reji da pik ni lak...
-Na ya..
-Kidang smekung ni nyak ngilu maaf kntu bg salah jk cawa rk cara sai mawat bukena..
-Na ya...
-Reji da pik ni lak, niat rk seghaja ku ji mulang bingi sinji. kntu bg kintu nihan mwek mebiak rk mk ngeganggu rasa ni, nyaku buharap kilu izin ki wekhak ni nyaku mirak putagu jma sanak bai dija....
-Oh..ya aa... Payu ana tangguhmu adu kudengi, mwek hk dedok masalah ki jma nyak ki sangon niat ni mahelau,. mingan jg do kanah kusampai ko ki hk ya makung pedom...
-Mejong pai niku, nyaku kuruk sarebok....
Mak mesaka luar nakbai tian sa, eh bang..adu saka kudo..? sapa rik mulang..? Sambil ngiking ko way kupi sang gelas daleh kimut ni decas decas.... *Mara do niku rani mara pk mwek legau lagi tugok sawai ya....

 

Irwan Fiskal

Pejemohni ratong paklunekni Nor...!
-Begeluk begegat cakak Assallamu 'alaikum
-Walaikumsalam ani bak Nor, nah niku Leham mejong api senghaja.?
-Reji udo daleh nyakakkon angkosni injangni..! Anggokni nyak hiruk campor guwai sinji, uleh nyak lagi ngangkon jama anak nakan ram.
-Repa cara Ham..? bang injuk mekincong nihan carani..?
-Naya.. kudenis sebingi no wek meranai uba tegol jak betwok jama anak nakan ram.?
-Naya... wat do kindang mak muneh hak mesesui ga nyakku ngebabidi meranai seno..!
-Na seno sai aga ku wrahkon jama udo..! Meranai saya jabal balak udi,... mak guwaini kintu ngejabal burani-rani...! Manuk ni ulun lebon, induh kebun ubi adu reni kik kelapa lagi kuk kupung direraw-rerawni sapa lagi kik mak guwaini meranai seno.
-Reno kudo penakaini meranai seno Ham...! mujor kidah nyak di gurah..
- Muloh kak ia bingi kanah aga ruyung bingkuk ji do agehni mak urung.....!

Dirga Riza

 Parah ana lak
kik adu wat tukang sasuti. Jemoh bingina ratong luwot maranai sa.
-asalamaualaikum..
-kum salam,.. *Injuk majantut timbalni pabalak ana jn* mak d kayuni kuruk atau pun mejong
-di andosni dleh salam... Karudu mejong nenggalan
-repa pamain lak..
-aja reji2 da. Api hak pamain
-owhh...
-reji ajo maranai..
-repa lak
-wat sai jak ngebimbing ka. Kariloh rek penakai ni anak ji..
-ya repa lak.?
-naya ana gl mwt mahalok kik lansung ku bimbing, kdng juk salah juga jak alak kik mwt kutanya lansungg..
-repa lak.. *burubah da kuk higuk mejong*
-wat sai cwa.. D pekon ni anak gumah. Lebon manuk... Rek kambing.. Jd d bimbing tian anak sai ngakukni..
-ya.. Jd uleh hal sna da alak juk bida hawani bingi ji.. Payu ana alak. Knt nyak kasi pandai sapa jalma sai cwa sna.
-na kch mwt dck ku keni pandai nak.. Knt rna da kbrni..
-mwt ngana gl lak.. Knt bng sai cwa sna lg maredek jm nya.. Nyak maklum
-repa bng rna? Sambil ngelinting mulek. Tembaku marang.
-kik temøn sai cwa sna. Lg palunek sangun.. Nyak nganggap wajar.. Mani nyak nangun masakek.. Cuma maaf lak kik nyak aga guwai sna..
-ngahema deleh nyuwah mulek sa
-ana gl lak mulani ya cwa sna, ya ga ngaliyak repa crani alak nanggapni... Palunek sekam no aga pandai.. Temon do mwt alak ga ngeni kepercyäan jm nyak...
-naya ana gl lg warahan jak bnguk riya.
Kdayani temon jm mwtni mwt muneh alak pandai...
-naya lak glarni rm d dunia semapu penakai..
-nah kch.. Injuk ti kanjat... Kung kuk ti sani ka way.. Alak kuruk pai..

mak masakani luwar juga kupi katok sa.. Sai ngusungni du nakbai sa.

Musibah Rawang di Pekon

Dewa Pujangga 

Wayak jak Mamak Dewa Pujangga

03 Desember 2012

Nyeru b'duru''

beka dada ngadengi..
bara mak manjang rani..
burepa kepa ngingi..
...

bugaga gambang hati..

rani jak terai kedok..
banjer way batang ari..
mandiri heni relok..
warga lamon sai ngungsi..

jerambah muneh pelok..
bingi seno terjadi..
mutor mubil tipandok..
mak dpok lumpak lagi.. 

Irwan Fiskal "..

Wayak jak Tamong Jambat

03 Desember 2012

Nyak juga Jerinjingan

Barong kabar kudengi..
Jerinjing ubun-ubun..
Ratongni tengah bingi..
Banjer rawang ngejujun..

Pekon neram sekeji..
Helau betik rek buyun..
Tabah neram puari..
Musibah ratong ngandun..

Ingok jama Tuhan Illahi..
Ram digijutni jak tundun..
Cuba tiulangkon di diri..
Lamon guwai ram mak buyun..

Pematang pulan dudi..
Buyun di bukak kebun..
Wat cadang uleh keti..
Kayu lamon di suhun..

Payu sunyin minak muari..
Dang ram nyalahkon hulun..
Kipak sekam mak menok keti..
Miwang hati jak pekonni ulun..

Josan Krui

Wayak jak Mamak  Josan Krui
05 Desember 2012

Kacah do ana kacah
Mati malang puari
Ramah kena musibah
Seno do sai kudengi

Takdir sinji jak ILLAH
Jejama ngaji diri
tabah do keti tabah
miwang sekam lom hati

halok ram lamon salah
lupa kayun ni NABI
ralang muneh ibadah
maka ram di uji NI

Ci' Fari Fanel

05 Desember 2012
....
Liak pai pulan tuha,,,
Kiri kanan megawang,,,
Ikin kik kaban kera,,
Bela sunyin kuk batang...
....
Ratong jak pulan tuha,,
Way banjer yado rawang,,,
Repa pik mak celaka,,,
Kik guwai sangun nyadang...
....
Dang lagi ti babinta,,,
Kik pagun jadi hiwang,,,
Payu rubah cerita,,,
Si nyani hati senang,,,,

JUKUNG PUKEK

  

“SELAMAT ATAS  LAHIRNYA KPB”

Sebuah Catatan Ilustrasi Penomena

JUKUNG PUKEK

“Narek Pukek jak tengah lawok sampai manggal adalah sebuah proses panjang”

“Jukung Pukek” nengah lawok ngusung seperangkat alat pukek, semekungni tukang pukekni adu wat target, :  yado ngena iwa latap kandul.

Pukek mak dapok manggal ki makdok say narekni. Jadi dilom proses manggalni pukek musti wat say narekni.

Tali pukek wat ruwa ujungni, ujung kiri rek kanan. Biasani tali say muwakni titarek yado tali huwi.

Pukek radu nengah pertanda radu kasi mulai ditarek. Say paling muwakni ratong ngakuni narek jak uncuk tali, “kelompok sinji biasani ngaku say paling berjasa”.

Wat muneh say ratong nulung narek senghaja ratong pas kak radu tali ijuk, “kelompok sinji ngaku muneh say paling berjasa”.

Kelompok ke-telu ratong nulung pas kandulni adu haga manggal. Kak kandul radu meredik sinji proses say paling menetukan. Dipastikon kabanni iwa pagun masih dilom lingkaran kandul apikah adu lamon sai lucuk / tekas, apikah pagun wat dilom kandul.

Dilom peroses manggalni pukek wat muneh sai nakal mak jujur nyarakkon kandul nyin iwa luar semekung manggal. Biasani diguwaikon tenggalan-tenggalan wat muneh bebarongan jama kelompok atau rekni. Guwai sinji sambil selom hahemaan nyin mak kepandaian.

Guwai say nyarakkon kandul jeno jelas ngerugikon pihak sekedauni pukek, untung muneh say bareh segaga nakukon penyayit, jala rek jaring… hahahaaa….!

Kandul radu manggal, biasani say jak nulung narek mejong nunggu bagian iwa jak sekedauni pukek.

Say narek jak uncuk tali….!, say ratong narek jak tali ijuk….!, say ratong narek pas kandulni radu haga manggal…..!  sunyinni ngaku say paling berjasa.

Biasani paling hatang cawa say narek jak uncuk tali..!

Dang,,dang… Udo Dang… nyak jak uncuk tali nihan…! Dang… dang… sekam narek jak uncuk tali nihan…! Reno pai kakirani pekikni tiyan maksudni tiyan sai paling berjasa dilom peroses manggalni pukek jeno.

Padehal tiyan lupa say ratong duri juga gegoh dilom proses seno, say penting kandulni pukek radu manggal..!

Tangerang, 14 Nopember 2012

Ilustrasi Cerita oleh : Irwan Fiskal

Puisi. 12

KIMUT MU

Sajak : Tamong Jambat

tajomni mata mu..

kalah matani kenui

tajom nyayak hati..

sabik kimut ku…

mata suluh muwala

siri nyak haga betuntong

ku untapkon kijok….

lebon di ramut angin liyu

Ahh…. Adu kidah…!

di kimut mu nyak panas ngison..

di kimut mu nyak tepuhai..

di kimut mu miyos bumi sinji..

di kimut mu betik damai sunyin..

Tangerang, Medio Ramadhon 1433 H

06.08.2012

Puisi. 11

SARAN

Sajak ; Tamong Jambat

dipa pungahni liyoh

tuwoh nyalok ranglaya

jukuk mak haga tuwoh

kuk hati telaju hapa

rawang ratong jak doh

di lamban… saran..

ngicik jama sapa

rani nambi tantu mak muloh..

Saran…

hiyon.. mangi..!

nyumpik halinu nenggalan..

induh kusepok dipa?

tiyakni hatimu mawat lagi

disuwah barong jukuk kiang..

tiram… tanyut barong raruyuh

Saran..

mawat kubinta lagi…..

tagan nyak tahabu..

Tangerang, 03.08.12

Puisi. 10

SANJOR  DI PINGGER LAWOK

Oleh : Tamong Jambat

Kebiyan ji makdok lagi say nyepok cinta

di hantara gudang, lamban tuha,

jama cerita tihang daleh lilikni tali……

Kapal, jukung makdok say nengah lawok

nyebu badan dilom yakin laju pujama

Merecap rani nawit rani kelom.

Wat muneh kepakni kepini kenui

ngegijut cadangni hati,

begiser rani tegar mid langui

nungga bujukni kehaga.

Mawat gemitok…

tano tanoh rek way pedom di sumpik umbak.

Makdok lagi…

Nyak nenggalan.

Lapah netai semenanjung,

maseh pengap haropan

sekali sampai di ujung mid do lapah

jak pantai pingger heni sinji, hiwang radu disumpik

Tangerang, 01.08.12

Puisi. 9

KATAN HATI

(1)

Dibingi say syahdu rek kelom
Tingok nyak jama bayangmu
Santor liyu di kicopni mataku
Radu kucuba ngelupakon niku

Kindang bayang mu, santor redik
Hiyon ditabor lesahkon kumbang tiram
Niku injuk angin say miyoskon
Jiwa rek badan ku…

Kindang tano, radu sio-sio mahligai demonku
Hanipi helau makdok lagi, lebon disuwah
Kayu harong jadi hambuwa…
Cuba kutanya jama bingi
Ia… puhaman mak cawa

(2)

Angin teliyu, mak ngeni
Jawaban,,
Angkah sai ya butanya
Mengapi nyak demon jama niku…

Mengapi nyak laher musti katan…
Nyak sadar, cinta mak musti sai jama badan
Kindang nyak mak dapok,…nyak mak rila
Halok wat say lebeh jak nyak ku….

Sampai kapan ratong masa ram betungga
Dapok muloh luwot, ki mawat bupisah terus…
Sangun hina badanku
Demon jama hulun say mak demon jama nyak
Rek mak pernah mekahut jama nyak..

(3)

Mengapi nyak betungga jama niku
Musim basoh dihatiku…
Injuk tuwohni bunini pari
Titini cintaku lebon reno gawoh

Api hati mu makdok sesol…
Makdok rasa jama nyak ku….
Niku lijung mid hanipi mu say ampai..

Tiramku radu dilesahkon…
Kahut ku tano radu dicampakkon
Halok radu hejongni
Angkah disakik daleh di cela wada???

Sinji kudo cubaan ku??
Sinji kudo sayakni hati rek katan??
Say mak mingan munyai lagi
Kipak wat penawar jak ipa ya juga…

Kekalau niku mebangik rek bahagia
Lebon jak halinuni badan ku…

Tamong Jambat

Tangerang, 31.07.12