Pilkada Pess. Barat

PEMILUKADA

Kab. Pesisir Barat

Kabupaten Pesisir Barat..

Kabarni haga Pemilukada..

Demokrasi pestaniRakyat..

Payu tisambut neram jejama..

Anjak Pugung mit di Bengkunat..
Hejong duniani meberak nana..

Mehelau nihan budaya jama adat..

Warisan tian pun si tuha raja..

Wat si nyalon haga jadi pejabat..

Jak jawoh rani radu tebar pesona..

Napol minak muari nyusun siasat..

Angonan buharap tipileh kak dinana..

Si nyalon sangon radu nyansat..
Bemudal mak bemudal dang setanya..
Bujanji jama marga puhebat-hebat..
Sai ramik nuggu kalau ana nyata..

Wat halok si ngesonkon serakat..
Penggemok jama si tuha marga..
Kilu dukung jama sunyin rakyat..
Tabik  ingok janji mu dang ki lupa..
.

Kilu nihan sinji angkah amanat..

Jama sapa ya si mirak berkuasa..

Dang ki haga nyani rakyat melarat..

Tipu daya daleh reka yasa..

Jama Peratin daleh Pak Camat..

Pejabat musti bebas rek merdeka..

Reno muneh jama sunyin aparat..

Barong rakyat jejama ram ngejaga..

Jama Aparat sai lagi ngejabat..

Dang biak kebelah wat si dibela..

Ki haga rakyat Krui selamat..

Pileh ram jejama si dapok dipercaya..

Ibarat pendikar main pincak silat..

Hedonko pasang kuda-kuda..

Dang asing pikni wat disikat..

Nungah raduni ram celaka..

Ki nanti Bupatini radu ngejabat..

Uyun betikkon bangun pekon ram sa..

Rakyat hanjak sejahtra selamat..

Berkah pahala muneh tantu mansa..

Sanghaja surat sinji kucatat..

Pesisir barat haga Pemilukada..

Tibulatkon tekad daleh niat..

Dang ui ki cadang ulehni sekilo gula..

Tulisan sinji radu tamat..

Ku kirim muneh mit dipa-dipa..

Wat di catat wat di surat..

Wat muneh di sosial media

Maksudni hati ku dilom niat..

Kilu mahap ki wat salah cara..

Uleh hanjak jama Pesisir Barat..

Desember kak nanti haga Pemilukada..

Tangerang, 29 Juli 2015

Oleh : Irwan Fiskal

Tinggal di Tangerang

Catatan Penulis;

Asal ku jak pekon Jambat..

Lagi midor radu jak saka..

30 tahun nyak berangkat..

Niat lapah nyepok rencaka..

Mawat muneh hak jadi Pejabat..

Jawoh muneh ki jadi pengusaha..

Mawat muneh hak jadi pengamat..

Ajo nyani wayak nguyunko budaya..

“ Wayak Uba “

“ Wayak Uba “

Oleh, Tamong Jambat

Ajo wui sate halipu..

Ampai iwak jak wawala..

Ku panggang suwa madu..

Sapa keti sai haga..

Wek muneh gulai alu..

Ampai mesak jak titapa..

Rasa pusing sakik ulu..

Cubakon nganik sup buha..

Nganik barong hatu legu..

Indai ram sumang dunia..

Way inom campor es batu..

Mi simpok bulung kelapa.. (lontong ana halok…)

Way haru sumor pitu..
Mehili makdok memata..

Wauw aku inaiy hamu..

Api kidah sai tirasa..

Payu wayak ram laju..

Asing pikni wat cerita..

Induh salah induh keliru..

Maklum judulni wayak uba.

Dehu dehu nyak tehabu..

Ngimbang di badan buya..

Mengan angkah lelabu..
Badan mepanas muwala..

Ngerang bulung tembaku..

Panas rani dang hahada..

Mahap di wayak ku taru..

Wayak sinji angkah becanda..

16 Maret 2013

CABANG PEDANG

CABANG PEDANG

Oleh Beni Haryanto di WAYAK KRUI SEANGKONAN MUARI (WKSM)

Beni Haryanto
Nyak cabang niku pedang.
Takhi di bah kelasa.
Nyak milak niku nyerang.
Di sasa pakai toya.

Bukelay makai pedang.
Ngebabat nuju dada.
Kheno muneh kik cabang.
Jak nangkis nyucuk mata.

Wayak umpama pekhang.
Seni delom penyawa.
Jak lalang jadi miwang.
Kintu nyikhok di khasa.

Sai halok jadi menang.
Mak halok Cawa khanya.
Ku hakhap nekham senang.
Betik lom kata kata.

Ci' Fari Fanel kusambang.
Ku hajat nyambung cawa.
Kekalau indai khiang.
Ngebalos wayak kita.

Tekekoh pagi tekhang.
Pagun nyak butatanya.
Lain kik niat nantang.
Hanya seni semata.

Nyak juga kukhang tenang.
Kintu bang salah cakha.
Tulis mawat petunang.
Kalau wat timbang khasa.

Gelakhni CABANG-PEDANG.
Di sani kukhang gula.
Induh kik sangun mantang.
Di sani jamma lima.

Mejong nyak di penjulang. (puakhi)
Ngebiti badan buya.
Badan pepoh ti kekhang.
Syariat di dunia.

Di tunggu balasan dari saudaraku Ci' Fari Fanel.

Adhey Bogher II (Naok)

Kham pekham pakai pedang
Tapengni anjak tempayak
Nyak lalang ngekak hatang
Pedangmu injuk buak

Lain kik ulih sombong
ngeluakhko cawa sinji
Sepok badanku sai tebong
Kintu lagi di kanik Besi

Kik pedang mak nganik
Dipa pai besi tuhamu
Pakai cabangmu kantik
Nyak haga ngetes Ilmu

Ilmu sinji lain mainan
Api lagi kik wewakhahan
sangun khadu keturunan
Anjak singanum masjid Taliban

kintu abang kung pekhcaya
Cuba pai tanya tanya
kintu wat sai pandai juga
Azimatni Ahli Syurga

( ngambur Fc88 " Bogher " )


Beni Haryanto (nimbal)

Kham pekhang pakai pedang.
Halok cekhita saka.
Nyak lalang ngekak hatang.
Ki pagun ti pubangga.

Judulni CABANG-PEDANG.
Wayakni harus kena.
Pertama ahiran ANG.
Kedua Ahiran A

Khisok juga ku kenang.
Cawani jamma tuha.
"Lalang nyak menok pedang."
Miwang nyak kena cawa.

Api sai kukhang tekhang.
Ilmu kasakh di mata.
Bancak nyak mena mulang.
Jak tayap di dunia.

Ku ulang lain nantang.
Tulung khisol pai juga.
Dang nihan cawa hatang.
Ku tunggu cawa waya.

kenako ahiranni puakhi.

Ci' Fari Fanel (naok)

Hahaaaaaa,,,, mekejung nihan ajo mamak,,,, payah nyakji ngingok si datas no,,,, payu aga ti cuba pai ajo....

Bingi dapok meterang,,,
Kipak mak bulan bara,,,
Hati ku laju gambang,,,
Di tantang sanak ngura,,,
......
cerita cabang rek pedang,,,
Teson kaban jawara,,,
kalau mak ngeba cadang,,
sai lunik nutuk khia,,,,
........
Kipak ya angkah cabang,,,
Seno radu senjata,,,
Mak guna pakai pedang,,,
Kik kah ngeranok khia,,,
......
ngedengi bunyi canang,,,
barong jama rabana,,,
Kik sampai pelok cabang,,,
Pedang laju mak kegapa,,,
.......
mak cabang reno pedang,,,
Mak lagi ngedok guna,,,
Si menang jadi arang,,,,
Utoh kik lebon nyawa....
......
repa caramu nulis si datas no mamak mehelau nihan,,,, bang gelarku nutuk ,, haahaaa...

Beni Haryanto (nimbal)

Wayakni CABANG-PEDANG.
Susun nekham jejama.
Mak udi hati senang.
Wayak betawok juga

Lain kik laga pedang.
Judul injuk umpama.
Indaian ngekhasa gambang.
Neduh jadi perkakha.

Sai ngukha lain lancang.
Belajakh nyepok laga.
Payu kham kicik lipang.
Nanya kabakh cakhita.

Nyak senang puakhi senang.
Pak miwang di dekhita.
Luh mekhuh di penjulang.
Inji takdir ni sai Kuasa.

Menok bulan jak gakhang.
Sededok musau dada.
Ngakuk wai laju Sembahyang.
Pengatu mak kheji juga.

Irwan Fiskal (naok)
Hahahahahahaaaaaa....... adu mulai ngeluar kon silek keti mamak....!
Penah pai nyak nagukuk jjimat ku.....

Butawok nutuk canang..
Nari mincak dilom kelasa..
Dang sampai muari cadang..
Kik negelut dang disasa..
...
Begelut dang disasa..
Tanda ni bakas jalang..
Wat budaya perani buka..
Buharak radu jak ngejalang..

Buharak radu jak ngejalang..
Bukak ni tari hadera..
Radu jak tiasah pedang..
Silek mak kasi sekena..

Gelintang bunyi ni canang..
Ditabuh bakas tuha.. Bumain makdok simenang..
Reno kik tari budaya..

Reno kik tari budaya..
Sinuntun turuk senang..
Guwai adu ralang tigapa..
Mesaka midor lupa mulang..

Mesaka midor lupa mulang..
Merantau radu mesaka..
Tiram nyak nahan miwang..
Ingok adat guwai dinana..

tabek pun mamak.... sikindua turuk kibui....!

Beni Haryanto (nimbal)

Pikha kali ku ulang.
Ngebaca sakhat makna.
Injuk ngewewakh benang.
Nyekhita ko budaya.

Budaya takhi pedang.
Di ikhingi khebana.
Kedua ya ngejalang.
Mintelu ya hadekha.

Sai makheda mulang.
Ano dia cakhita.
In selalu di kenang.
Najin pak mawat nanya.

Mak lagi zaman pekhang.
Tabinta zaman saka.
Bancak nyepok Masenang.
Jak nyepok gara gara.

Cawa khadu melayang.
Wayak betawok dia.
Pikha wayak ti bantang.
Wajib ku balos dija.

Hery Ismet Syahfirie (naok)

Keti telu tari budindang,...
Sekam nabuh rabana,..
Mamak Irwan nabuh canang,..
Guwaian sangun senghaja,..

Nengah kon tari pedang,..
Buharak kuruk nuju kelasa,..
Pengantini butawit sinjang,..
Sai nari mak ngasi sumang,..

Sai nari mak ngasi sumang,..
Gerak langkah gegoh pujama,..
Mingan tari mak cadang,..
Keti tulu mak ngasi sawada,...

Mingan tari mak cadang,..
Mamak beni guru ram dija
Mong fari belajar tari pedang,..
Sekam papenok ni pai ria,...

Ki bulajar tari pedang,..
Dang ki sampai binasa,..
Kanah wat sai laju mulang,..
Lawan ni muneh budusa,...

Mamak Irwan adu nabuh canang,...
Penganten radu sampai kelasa,..
Sai nari dang ki mulang,...
Bingikanah ratong luwot mik dija,...

Beni Haryanto (nimbal)

Ya takhi kheno gendang.
Takhi linggok pusaka.
Mamak Hery mak tenang.
Tekhok ya nengah juga.

Belajakh wayak panjang.
Ngalimak khik besuya.
Amun tulisan cadang.
Payu lulah jejama.

Nyesol nyak makai sinjang.
Kik kheji sai ti khasa.
Yu payu kalau kalau senang.
Junjung adat budaya.

Kapan kik waktu lapang.
Ija kham kumpul dija.
Lain nyepok sai menang.
Bebalah kham jejama.

Khisok muneh naningang.
Kapan kak akal bela.
Mak ubah kasni khawang.
Mak tinggal kintu kheba.

Tinggal khebani lagi ano mamak Hery Ismet Syahfirie .

Hihihiiii... Balin haguk sai ti bahas kham.... :D

Ci' Fari Fanel (naok)
Jak angkah kejung rekang,,,
Kalau laju sehasta,,,
Helau do kicik tilipang,,,
Tanda nyambung cerita,,
........
Jawoh lumpak mik seberang,,
Jawoh jak ulun tuha,,,
Payah ti tahan hiwang,,,
Eluh luah jak mata....
.....
Biak muneh kuk jimpang,,, Kidang sangun tipaksa,,,
Kalau butungga senang,,,
Sangun niat usaha,,,
........
Luh meruh di penjulang,,,
Kidangwi api daya,,,
Laju lapah butandang,,,
Dang sampai putus Du'a,,,
.......
Du'a semanjang manjang,,,
Semanjang ni ranglaya,,,
Kalau laju mesenang,,,
Ngilu jama SAI KUASA,,,
........
Radu kutanam kumbang,,,
Radu muneh kukuta,,,
Kalau jejama senang,,,
Hurik ram di dunia,,,,
.....

kilu mahaf dalam penulisan R nya

antak ija pay goh mamak Beni,,,

Beni Haryanto (nimbal)

ak angkah kejung khekang.
Kalau laju sehasta.
Kintu kham lagi malang.
Ngehakhap hukhik jaya.

Umpama nanom kumbang.
Usaha di dunia.
Mak ngilu hukhik cadang.
Sampai menutup mata.

Umpama kepas khekang.
Kelitah khadu saka.
Jak tandang aga mulang.
Seno muneh sai nyata.

Sapa nihan sai menang.
Rahasia sai kuasa.
Kintu nihan kham mulang.
Sangu lagi khekhada.

Sakikni hukhik malang.
Seno lagi di dunia.
Akherat nutuk malang.
Allah Tuhan, dang khia.

Dang lupa kham sembahyang.
Malim khisok cakhita.
Mak nihan guna miwang.
Kik khadu pindah nyawa.

Beni Bangsawan:
"Singkuh nyak Ma2k reno kik jak senemonni keti ...kidang bang mk seurawan."

Ci' Fari Fanel :Mamak Beni B>,
"ana ngia sangun adu di kekiyau Namo mu,, kidang halok mani kelinguk Gunungni Jepang jadi mak kedengisan ,,,,, haaaa,,haaaaa....
Payu mamak Beni B, tanjardo dija, pandai kanah Namo mu ana si ngelulahni,,, heeee....."

Beni Bangsawan:
"yu...jak jeno nyak adu hasang aga nanjar koni...kidang kubaca kicek tuha payah nyak aga nyulangni....siiip lah rek mu tukang sasa gawoh ...hahai"

Beni Haryanto:
 "@Namo Bangsawan: lain kheno tek. Payu ti khamik ko kham ajo. Kidang ajo aga tenangpai sakhebok. Cik fari bang magat temon. Lansung di sambarni do tiap di bantangko. Pasangko demu namo."

Ci' Fari Fanel (naok)
 Huuuhuuuyyyy,,, payu tibalos,, nyak nyuwah rukuk pay,, qiqiqiqiqi....

Kik sangun lagi malang,,,
dang nihan tirerasa,,,
Tandani Allah sayang,,,
Seno cubaan khia,,,
,,,,
Mahelau sangun kumbang,,,
Kidang penghias khia,,,
Dang wi kik sampai cadang,,,
Kintu kanah binasa,,,,
......
Jak tandang haga mulang,,
Kayu nebak ranglaya,,
Tokko ki aga nyadang,,,
Layau kik mak tigaga,,,
.......
Kik sangun neram mulang,,,
Peratong mak sepira,,,
Kalau lamon si sayang,,,
Ngirimko neram Du'a....
.....
Temonkik hurik malang,,,
Mesakik si tirasa,,,
Api gunani ladang,,,
Kik tuwoh jukuk ria,,
,,,,,,
Api gunani hiwang,,,
Kik hiwang nurun niga,,,
Kik sangun neram mulang,,,
Takdirni si kuasa,,,,

Beni haryanto (nimbal)

Mak guna lagi hiwang.
Nyawa luakh hamakha.
Hakhap mak cambus jukhang.
Delom apui ngewala.

Ajo bumi tebantang.
Semapu di khemawa.
Tuntunan hukhik senang.
Ya kindoni Agama.

Ibadah lagi khalang.
Sedekah kheno juga.
Khisok juga tekiwang.
Ngangonko lamon dusa.

Umokh khadu bubilang.
Mekung ngedok khencaka.
Bedakhak laju mulang.
Nyuba hukhik di jawa.

Khegah jan sambil miwang.
Ngusung tambulan bekakha.
Nyesat pak lapah khangkang.
Asal lijung jak makhga.

Ku cekhita ko senang.
Kapan kak ulun tuha nanya.
Kesipak juga lalang.
Pak Ina nahum juga.

Lehotni bancak mulang.
Ajo wat kebun dija.
Sangun mak udi sayang.
Sai ngelahekhko kham di dunia.

Ano cekhitani sanak cik, sangun mekung kenani ano gila, kidang payu di cekhita ko cutik kisahku nyepok sesuap nasi ani tianji.


Alhamdulillah betawok juga sampai tanggal 03 Januari 2010 jam 4:20 .
Memory 2010 di WAYAK KRUI SEANGKONAN MUARI di grup lama.

"BULIPANG"

“ BULIPANG “

Wayak Tamong Jambat

Risok ku biti badan..

Lamon nihan tenemu..

Putus kita burasan..

Judu kita mak temu..

Mak ikin jadi sesolan..

Pulipang anjak niku..

Urung kita bulamban..

Ulun tuha mu mak setuju..

Sakik lain sandangan..

Lapah ngilikkon paku..

Saka rasan di andan..

Ki kahut mekung radu..

Sesol dang jadi hiwangan..

Yu payu tagankon liyu..

Ibarat way di hilian..

Kalau manggal di anak umpu..

Laju niku bulamban..

Genok nyak ngeni restu..

Wat salah ram semahapan..

Di guwai sakik sai radu..

Lapah do lalegohan..

Hitung bubilang telu..

Tepik do nyak nenggalan..

Menah ganti si gegoh niku..

Pisah kita jak atas titian..

Jerambah batang kayu..

Dang ki putus kemuarian..

Sai radu tinggalkon radu..

Dang ki mak setaguan..

Ki telibak di lamban mu..

Kalau lagi bangik mengan..

Kipak puliak angkah halinu..

Antak ija pai tangguhan..

Wayak guwai penagu..

Kapan di guwai tayuhan..

Haga nyak salam jama niku..

Ku tulis sinji karangan..

Ku pahat di lambung batu..

Kalau munjadi ingok’an..

Kapan ki tiram jama niku..

Tangerang, 12 . 01 . 13

Nangguh Nagu Nakbai

Dewa Pujangga

_Tok..tok...took... Assalamualaykum....
-Waalaykumsalam ija kuruk...sesalaman daleh kuruk..
-Mejonga pai...
-Daleh mejong, hara injuk santai ni Lak..
-Api lg pemainan ni dija... daleh nyuwah rukuk..
-Ah..biasa api pemain mawek, injuk ayuk ni riya perulang sabah no, ana lg basa ni menah pari metong....
-Oh..ya.. ya.. ya.. adu aga juga dija ki reno lak, mni ki bagian hk unggak kamdi ampai simpun nihan jk nanom...
-Riya kudo... Daleh nyuwah rukuk...
-Lain maaf pai cawa nebak Lak..
-Ho''o....api sanduwat ni kidah...
-Reji da pik ni lak...
-Na ya..
-Kidang smekung ni nyak ngilu maaf kntu bg salah jk cawa rk cara sai mawat bukena..
-Na ya...
-Reji da pik ni lak, niat rk seghaja ku ji mulang bingi sinji. kntu bg kintu nihan mwek mebiak rk mk ngeganggu rasa ni, nyaku buharap kilu izin ki wekhak ni nyaku mirak putagu jma sanak bai dija....
-Oh..ya aa... Payu ana tangguhmu adu kudengi, mwek hk dedok masalah ki jma nyak ki sangon niat ni mahelau,. mingan jg do kanah kusampai ko ki hk ya makung pedom...
-Mejong pai niku, nyaku kuruk sarebok....
Mak mesaka luar nakbai tian sa, eh bang..adu saka kudo..? sapa rik mulang..? Sambil ngiking ko way kupi sang gelas daleh kimut ni decas decas.... *Mara do niku rani mara pk mwek legau lagi tugok sawai ya....

 

Irwan Fiskal

Pejemohni ratong paklunekni Nor...!
-Begeluk begegat cakak Assallamu 'alaikum
-Walaikumsalam ani bak Nor, nah niku Leham mejong api senghaja.?
-Reji udo daleh nyakakkon angkosni injangni..! Anggokni nyak hiruk campor guwai sinji, uleh nyak lagi ngangkon jama anak nakan ram.
-Repa cara Ham..? bang injuk mekincong nihan carani..?
-Naya.. kudenis sebingi no wek meranai uba tegol jak betwok jama anak nakan ram.?
-Naya... wat do kindang mak muneh hak mesesui ga nyakku ngebabidi meranai seno..!
-Na seno sai aga ku wrahkon jama udo..! Meranai saya jabal balak udi,... mak guwaini kintu ngejabal burani-rani...! Manuk ni ulun lebon, induh kebun ubi adu reni kik kelapa lagi kuk kupung direraw-rerawni sapa lagi kik mak guwaini meranai seno.
-Reno kudo penakaini meranai seno Ham...! mujor kidah nyak di gurah..
- Muloh kak ia bingi kanah aga ruyung bingkuk ji do agehni mak urung.....!

Dirga Riza

 Parah ana lak
kik adu wat tukang sasuti. Jemoh bingina ratong luwot maranai sa.
-asalamaualaikum..
-kum salam,.. *Injuk majantut timbalni pabalak ana jn* mak d kayuni kuruk atau pun mejong
-di andosni dleh salam... Karudu mejong nenggalan
-repa pamain lak..
-aja reji2 da. Api hak pamain
-owhh...
-reji ajo maranai..
-repa lak
-wat sai jak ngebimbing ka. Kariloh rek penakai ni anak ji..
-ya repa lak.?
-naya ana gl mwt mahalok kik lansung ku bimbing, kdng juk salah juga jak alak kik mwt kutanya lansungg..
-repa lak.. *burubah da kuk higuk mejong*
-wat sai cwa.. D pekon ni anak gumah. Lebon manuk... Rek kambing.. Jd d bimbing tian anak sai ngakukni..
-ya.. Jd uleh hal sna da alak juk bida hawani bingi ji.. Payu ana alak. Knt nyak kasi pandai sapa jalma sai cwa sna.
-na kch mwt dck ku keni pandai nak.. Knt rna da kbrni..
-mwt ngana gl lak.. Knt bng sai cwa sna lg maredek jm nya.. Nyak maklum
-repa bng rna? Sambil ngelinting mulek. Tembaku marang.
-kik temøn sai cwa sna. Lg palunek sangun.. Nyak nganggap wajar.. Mani nyak nangun masakek.. Cuma maaf lak kik nyak aga guwai sna..
-ngahema deleh nyuwah mulek sa
-ana gl lak mulani ya cwa sna, ya ga ngaliyak repa crani alak nanggapni... Palunek sekam no aga pandai.. Temon do mwt alak ga ngeni kepercyäan jm nyak...
-naya ana gl lg warahan jak bnguk riya.
Kdayani temon jm mwtni mwt muneh alak pandai...
-naya lak glarni rm d dunia semapu penakai..
-nah kch.. Injuk ti kanjat... Kung kuk ti sani ka way.. Alak kuruk pai..

mak masakani luwar juga kupi katok sa.. Sai ngusungni du nakbai sa.

Musibah Rawang di Pekon

Dewa Pujangga 

Wayak jak Mamak Dewa Pujangga

03 Desember 2012

Nyeru b'duru''

beka dada ngadengi..
bara mak manjang rani..
burepa kepa ngingi..
...

bugaga gambang hati..

rani jak terai kedok..
banjer way batang ari..
mandiri heni relok..
warga lamon sai ngungsi..

jerambah muneh pelok..
bingi seno terjadi..
mutor mubil tipandok..
mak dpok lumpak lagi.. 

Irwan Fiskal "..

Wayak jak Tamong Jambat

03 Desember 2012

Nyak juga Jerinjingan

Barong kabar kudengi..
Jerinjing ubun-ubun..
Ratongni tengah bingi..
Banjer rawang ngejujun..

Pekon neram sekeji..
Helau betik rek buyun..
Tabah neram puari..
Musibah ratong ngandun..

Ingok jama Tuhan Illahi..
Ram digijutni jak tundun..
Cuba tiulangkon di diri..
Lamon guwai ram mak buyun..

Pematang pulan dudi..
Buyun di bukak kebun..
Wat cadang uleh keti..
Kayu lamon di suhun..

Payu sunyin minak muari..
Dang ram nyalahkon hulun..
Kipak sekam mak menok keti..
Miwang hati jak pekonni ulun..

Josan Krui

Wayak jak Mamak  Josan Krui
05 Desember 2012

Kacah do ana kacah
Mati malang puari
Ramah kena musibah
Seno do sai kudengi

Takdir sinji jak ILLAH
Jejama ngaji diri
tabah do keti tabah
miwang sekam lom hati

halok ram lamon salah
lupa kayun ni NABI
ralang muneh ibadah
maka ram di uji NI

Ci' Fari Fanel

05 Desember 2012
....
Liak pai pulan tuha,,,
Kiri kanan megawang,,,
Ikin kik kaban kera,,
Bela sunyin kuk batang...
....
Ratong jak pulan tuha,,
Way banjer yado rawang,,,
Repa pik mak celaka,,,
Kik guwai sangun nyadang...
....
Dang lagi ti babinta,,,
Kik pagun jadi hiwang,,,
Payu rubah cerita,,,
Si nyani hati senang,,,,